(ប្រទេសថៃ)៖ បន្ទាប់ពីប្រកាសបិទច្រកទាំងអស់ ជាមួយកម្ពុជាហើយនោះ នៅពេលនេះ យោធាភូមិភាគ២ របស់ថៃ ដែលគេដឹងថា ដឹកនាំដោយ ឧត្តមសេនីយ៍ឯក Boonsin Padklang បានចេញបទបញ្ជាថ្មី ដោយកែសម្រួលលើការបើក បិទច្រកព្រំដែនមួយ ចំនួនជាមួយកម្ពុជា ដោយមិនខ្វល់ពី រដ្ឋាភិបាលថៃឡើយ។
មណ្ឌលប្រតិបត្តិការ កងទ័ពភូមិភាគទី២ របស់ថៃ នៅថ្ងៃនេះបានចេញវិធាន ការអំពីការបើកបិទច្រក ជាមួយកម្ពុជាដូចតទៅ៖
១៖ ច្រកព្រំដែនអន្តរជាតិឆងចោម ឃុំដាន ស្រុកកានឆឺង ខេត្តសុរិន្ទ៖ បើក-បិទជារៀងរាល់ថ្ងៃ ចាប់ពីម៉ោង ៦:០០ ព្រឹក ដល់២២:០០នាទីយប់
២៖ ច្រកព្រំដែនអន្តរជាតិឆងសាង៉ាំ ឃុំប្រៃផាត់ថាណា ស្រុកភូស៊ីង ខេត្តស៊ីសាកេតៈ បើក-បិទជារៀងរាល់ថ្ងៃ ចាប់ពីម៉ោង ៧:០០ ព្រឹក ដល់២២:០០ នាទីយប់
៣៖ ច្រកតំបន់ពាណិជ្ជកម្មសាយតាគូ ឃុំចាន់ថាភេត ស្រុកបានគ្រួត ខេត្តបុរីរ៉ាំ : បើក-បិទជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ១៥:០០ នាទីល្ងាច
សូមបញ្ជាក់ថា កាលពីថ្ងៃទី២៣ ខែមិថុនា ឆ្នាំ២០២៥ យោធាភូមិភាគី២របស់ថៃ បានចេញបញ្ជាឱ្យបិទច្រកព្រំដែនទាំងអស់ជាមួយកម្ពុជា ដោយអនុញ្ញាតឱ្យចេញចូលតែ សិស្សានុសិស្ស និងអ្នកជំងឺដែលត្រូវការការព្យាបាលបន្ទាន់ប៉ុណ្ណោះតែប៉ុណ្ណោះ។
ទោះជាយ៉ាងនេះក្តី មជ្ឈមណ្ឌលគ្រប់គ្រងព្រំដែនរបស់ថៃ បែរជាចេញមកបញ្ជាក់ថា ព្រំដែនកម្ពុជា-ថៃ ទាំងអស់ នៅតែបើកដំណើរការធម្មតា មិនមានការបិទនោះទេ។ នេះបើយោងតាម ការចុះផ្សាយពីសារព័ត៌មាន Khaosod៕
