(ខេត្តបាត់ដំបង)៖ បុរសម្នាក់ត្រូវបានកម្លាំង នគរបាលស្រុកសំពៅលូន ឃាត់ខ្លួនតាមពាក្យបណ្តឹងម្ចាស់ចំការ បន្ទាប់ពីបុរសខាងលើ ធ្វើបានសកម្មភាពលួចបេះ ផ្លែស្វាយ និងត្រយ៉ូងចេក ក្នុងចំការអ្នកស្រុកជារឿយៗ។
ការឃាត់ខ្លួនជនសង្ស័យនេះ ធ្វើឡើងកាលពីរសៀល ថ្ងៃទី០៤ខែធ្នូឆ្នាំ២០២៤ វេលាម៉ោង១៦និង១០នាទី នៅចំណុចក្រុមទី១ ភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង។
លោកវរៈសេនីយ៍ទោ ទឹម វិឆ័យ អធិការនគរបាលស្រុកសំពៅលូន បានប្រាប់អោយដឹងថា ជនសង្ស័យមានឈ្មោះ ង៉ោល យ៉ែម ភេទប្រុសអាយុ២៨ឆ្នាំ មានទៅលំនៅភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ចំណែកជនរងគ្រោះ ជាម្ចាស់ចំការមានឈ្មោះ អាន ចាន់ ភេទប្រុសអាយុ ៣៦ឆ្នាំ មានទីលំនៅបច្ចុប្បន្ន ភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង មុខរបរ ធ្វើចំការ នៅចំណុចចំការកន្លែងកើតហេតុខាងលើ។
លោកវរៈសេនីយ៍ទោ ទឹម វិឆ័យ អធិការនគរបាលស្រុកសំពៅលូន បានប្រាប់អោយដឹងទៀតថា មុនពេលកើតហេតុ ជនសង្ស័យខាងលើបានធ្វើសកម្មភាពលួចបេះ ផ្លែស្វាយ និងត្រយ៉ូងចេក ត្រូវឈ្មោះ អាន ចាន់ បានឃើញនិងបានរាយការមកកាន់ អធិការរដ្ឋាននគរបាលស្រុកសំពៅលូន ភ្លាមៗនោះកម្លាំងនគរបាលស្រុកសំពៅលូន សហការជាមួយកម្លាំងប៉ុស្តិ៍នគរបាលរដ្ឋបាលឃុំតាស្តា និងបានចុះទៅដល់កន្លែងកើតហេតុ ព្រមទាំងឃាត់ខ្លួនជនសង្ស័យខាងលើបានភ្លាមៗតែម្តង។
ក្រោយពីឃាត់ខ្លួនជន សង្ស័យខាងលើកម្លាំង ជំនាញដកហូតវត្ថុតាបានរួមមាន ផ្លែស្វាយចំនួន មួយការ៉ុង ស្មើនឹង ១៣៥ គីឡូក្រាម ត្រយ៉ូងចេកចំនួនកន្លះការ៉ុង ស្មើនឹង ១៦ត្រយ៉ូង កាំបិតចំនួន០១ ម៉ូតូចំនួន ០១ គ្រឿង ម៉ាកហុងដាឌ្រីម សេរីឆ្នាំ២០២០ ផ្លាកលេខ 1AJ-6951 បាត់ដំបង ដែកកេះសម្រាប់ជក់គ្រឿងញៀន ចំនួន០១ និងសម្ភារៈសម្រាប់ជក់គ្រឿងញៀនមួយចំនួន ។
បច្ចុប្បន្នជនសងសង្ស័យខាងលើរួមទាំងវត្ថុតាង ត្រូវបានកម្លាំងនគរបាននាំខ្លួនមកកាន់អធិការដ្ឋាននគរបាលស្រុកសំពៅលូន ដើម្បីកសាងសំណុំរឿង បញ្ជូនទៅការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធី ។
