(ខេត្តកំពត)៖ ក្នុងឱកាសព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិការ ឆ្នាំ២០២៤ ខេត្តកំពត មានភ្ញៀវទេសចរជាតិ និងអន្តរជាតិ បានចូលមកសម្រាកកម្សាន្ត និងស្នាក់នៅប្រមាណជាង ១៣ ម៉ឺននាក់។
ប្រធានមន្ទីរទេសចរណ៍ខេត្តកំពត លោក សយ ស៊ីណុល បានប្រាប់ឱ្យដឹងថា ក្នុងរយៈពេល៣ថ្ងៃ ក្នុងឱកាសនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ភ្ញៀវទេសចរជាតិ និងអន្តរជាតិ បានចូលមកសម្រាកលម្ហែកម្សាន្តក្នុងខេត្តកំពត មានចំនួន ១៣៤.៦២២នាក់ មានការកើនឡើង ៥៩.៨២% បើធៀបនឹងឆ្នាំ២០២៣។ ក្នុងនោះ ភ្ញៀវទេសចរជាតិ មានចំនួន ១៣២.៤១៦នាក់ និងភ្ញៀវទេសចរបរទេស មានចំនួន ២.២០៦នាក់។ ចំពោះស្ថានភាពទូទៅ នៅតាមរមណីយដ្ឋានទេសចរណ៍ សហគមន៍ទេសចរណ៍ និងទីតាំងផ្តល់សេវាទេសចរណ៍ និងសេវាស្នាក់នៅក្នុងខេត្ត មានភាពល្អប្រសើ មិនមានភាពមិនប្រក្រតី ណាមួយកើតឡើងគួរឱ្យ កត់សម្គាល់នោះឡើយ។
លោកប្រធានមន្ទីរបានបន្តទៀតថា ចំពោះសេវាស្នាក់នៅ សេវាម្ហូបអាហារ ក្នុងឱកាសនៃព្រះរាជពិធីបុណ្យអុំទូក រយៈពេល ៣ថ្ងៃកន្លងមកនេះ ក៏មិនមានការតម្លើងថ្លៃ ណាមួយដែលមិន សមរម្យនោះទេ ហើយកន្លែងស្នាក់នៅ មួយចំនួនម្ចាស់សណ្ឋាគារ ផ្ទះសំណាក់ ឬរមណីយដ្ឋានមួយចំនួន ក៏មានការបញ្ចុះតម្លៃថែមទៀតផង។ ចំណែកការធ្វើដំណើរ របស់ភ្ញៀវលើដងផ្លូវ គ្រប់ទីកន្លែងទូទាំងខេត្ត មានស្ថានភាពល្អប្រសើរ ដោយគ្មានករណីគ្រោះថ្នាក់ ឬហេតុការណ៍អ្វីកើតឡើង គួរឱ្យកត់សម្គាល់នោះឡើយ។
តាមការសន្និដ្ឋានជារួមស្ថានភាពទូទៅ គឺដំណើរការមានភាពល្អ ដោយយោងតាមការណែនាំ និងប្រសាសន៍ផ្ដាំផ្ញើរបស់ឯកឧត្តម ម៉ៅ ធនិន អភិបាលខេត្តកំពត ក្នុងពិធីជួបសំណេះសំណាល ជាមួយប្រតិបត្តិករទេសចរណ៍ មកពីគ្រប់ទីកន្លែងនៃខេត្តកំពត កាលពីថ្ងៃទី៧ ខែវិច្ឆិកា កន្លងមកនេះ ដែលធ្វើឱ្យប្រតិបត្តិករទេសចរណ៍ទាំងអស់មានការយល់ដឹង ចាប់អារម្មណ៍ និងយកចិត្តទុកដាក់អនុវត្ត តាមប្រសាសន៍របស់លោក អភិបាលខេត្តកំពត ដោយបម្រើភ្ញៀវ ទេសចរណ៍បានយ៉ាងល្អប្រសើរ និងភាពស្មោះត្រង់ នាឱកាសបុណ្យអុំទូកឆ្នាំ២០២៤នេះ៕ ដោយលោក សេង ណារិទ្ធ
