(ខេត្តកំពត)៖ នៅព្រឹកថ្ងៃទី២២ ខែសីហា ឆ្នាំ២០២៤នេះ ឯកឧត្តមបណ្ឌិត ម៉ៅ ធនិន អភិបាល នៃគណៈអភិបាលខេត្តកំពត និងលោកជំទាវ ហ៊ុន ចាន់ធី បានអញ្ជើញដឹកនាំមន្ត្រីរាជការ មន្ទីរអង្គភាព ធ្វើពិធីក្រុងពាលី ដំឡើងនាឡិកាកម្ពស់៣៥ម៉ែត្រ ស្ថិតក្នុងភូមិតាអង្គ សង្កាត់ត្រើយកោះ ក្រុងកំពត ខេត្តកំពត។
ក្នុងពិធីនេះ ឯកឧត្ដម បណ្ឌិត ម៉ៅ ធនិន អភិបាលខេត្តកំពត បានបង្ហើបឲ្យដឹងថា ការសាងសង់ នាឡិកាយក្សនេះ មានកម្ពស់៣៥ម៉ែត្រ មុខនាឡិការមានអង្កត់ផ្ចិតជិត១០ម៉ែត្រ ហើយត្រូវបានរចនាឡើង ទៅតាមរចនាបថរបស់ខ្មែរសុទ្ធសាធ។ ហើយនាឡិកាយក្សនេះ នឹងមានលេខម៉ោង គឺប្រើប្រាស់ជាលេខខ្មែរទាំងអស់ រួមនឹងក្បាច់ផ្កាភ្ញីផ្សេងៗទៀតជារចនាបទខ្មែរ ហើយរដ្ឋបាលខេត្ត ក៏បានរៀបចំឆ្នេរសមុទ្រកម្សាន្ត ប្រកបដោយភាព ទាក់ទាញផងដែរ។
ឯកឧត្តម ម៉ៅ ធនិន ឲ្យដឹងទៀតថា ក្រោយពីសមិទ្ធផលទេសចរណ៍ជាច្រើនមានដូចជា ឆ្នេរខ្សាច់កម្សាន្ត រូបសំណាកត្រីសេះសមុទ្របាញ់ទឹក និងទីតាំងសម្រាកលំហែជាច្រើនកន្លែង ត្រូវបានរៀបចំឱ្យមានភាពទាក់ទាញ លំហូរភ្ញៀវទេសចរដែលមកសម្រាកកម្សាន្ត ក្នុងខេត្តកំពត មានការកើនឡើងគួរឱ្យកត់សម្គាល់។
ឯកឧត្តមអភិបាលបានបន្តថា “កំពតគឺជាខេត្តមួយ ក្នុងចំណោមខេត្តទាំងបួន ដែលជាប់នឹងតំបន់ឆ្នេរសមុទ្រកម្ពុជា ហើយគឺជាខេត្ត ដែលមានសក្តានុពល លើវិស័យទេសចរណ៍។ ដូច្នេះអាជ្ញាធរខេត្តបានជ្រើសយក ការអភិវឌ្ឍវិស័យទេសចរណ៍ជាចំបង និងមុនគេ ក្នុងចំណោមវិស័យផ្សេងៗទៀត ដែលមានសក្តានុពលក្នុងខេត្ត”។
ឯកឧត្តមអភិបាលខេត្ត បានបញ្ជាក់ដែរថា គោលដៅចំបងដែល អាជ្ញាធរខេត្តជ្រើសរើស យកវិស័យទេសចរណ៍នេះ មកអភិវឌ្ឍជាចំបងមុនគេនោះ គឺដោយសារតែខេត្តកំពត មានទីតាំងជាច្រើនដែលពោរពេញ ទៅដោយសក្តានុពលទេសចរណ៍ ព្រមទាំងការទាក់ទាញ ដែលយើងមិនទាន់បានកែច្នៃ ដើម្បីស្រូបទាញភ្ញៀវទេសចរ និងផលប្រយោជន៍ជូនពលរដ្ឋ ការនាំចេញផលិតផលនៅនឹងកន្លែង ហើយគោលដៅសំខាន់នោះគឺផ្តោតទៅលើការលើកកម្ពស់ជីវភាព រស់នៅរបស់ប្រជាពលរដ្ឋ តាមរយៈការទទួលបានចំណូល ពីវិស័យដ៏មានសក្តានុពលមួយនេះ៕ សេង ណារិទ្ធ
