អត្ថបទ រូបភាព ដោយៈ សេង ណារិទ្ធ
ខេត្តកែប: ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានអំពាវនាវដល់គ្រប់ស្ថាប័នពាក់ព័ន្ធ អាជ្ញាធរដែនដី អង្គការជាតិ អន្តរជាតិ និង វិស័យឯកជននានាក្នុងខេត្តទាំងមូល មេត្តារួមគ្នារិះរកវិធីជំរុញលើកទឹកចិត្ត ដល់យុវជនដែលជាអ្នកបន្តវេនឲ្យចូលរួមដោយស្មារតីស្រឡាញ់វប្បធម៌ជាតិខ្លួនតាំងពីវ័យកុមារ រហូតដល់យុវវ័យ ដើម្បីធ្វើឱ្យវប្បធម៌ជាតិយើង មាននិរន្ដរភាពក្នុងផ្នត់គំនិតយុវជន និងមហាជនគ្រប់លំដាប់ថ្នាក់ក្នុងន័យ «វប្បធម៌ដើម្បីការអបរំ ការអប់រំដើម្បី វប្បធម៌”។
ឯកឧត្តមបណ្ឌិត មានប្រសាសន៍លើកឡើងដូចនេះ ក្នុងឱកាសប្រារព្ធពិធីអបអរសាទរទិវាវប្បធម៌ជាតិ ៣មីនា លើកទី២៦ ឆ្នាំ២០២៤ ក្រោមប្រធានបទ(យុវជនដើម្បីវប្បធម៌ជាតិ) ក្រោមវត្តមានចូលរួមជាអធិបតីភាពផងដែរពីសំណាក់ ឯកឧត្តម សំ សារីន ប្រធានក្រុមប្រឹក្សាខេត្ត និងអ្នកពាក់ព័ន្ធជុំវិញខេត្ត ប្រមាណ៣៤៥នាក់ កាលពីរសៀលថ្ងៃទី២៨ ខែមីនា ឆ្នាំ២០២៤។
តាមបាយការណ៍របស់ លោក តុង ភោ ប្រធានមន្ទីរវប្បធម៌ និងវិចិត្រសិល្ប:ខេត្តកែប បានអោយដឹងថា ការរៀបចំពិធីអបអរសាទរទិវាវប្បធម៌ជាតិ ៣មីនា លើកទី២៦ ឆ្នាំ២០២៤ ក្រោមប្រធានបទ (យុវជនដើម្បីវប្បធម៌ជាតិ)ក្នុងគោលបំណងដើម្បីឱ្យប្រជាពលរដ្ឋ យុវជន និងកុមារ ដែល ជាអ្នកបន្តវេនយល់ដឹងច្បាស់ពីតម្លៃដ៏វិសេសវិសាលនៃវប្បធម៌ ប្រពៃណី ទំនៀមទម្លាប់ប្រពៃណីជាតិ និងជំរុញឲ្យពួកគេចូលរួមថែរក្សា ការពារ លើកតម្កើងកេរ្ដិ៍ដំណែល អភិរក្ស និងអភិវឌ្ឍវប្បធម៌ជាតិដ៏ថ្លៃថ្លារបស់បុព្វបុរស យើងដែលបានបន្សល់ទុក។
បន្ថែមពីលើនោះ ឯកឧត្តមបណ្ឌិត សោម ពិសិដ្ឋ មានប្រសាសន៍ដែរថា បច្ចុប្បន្ននេះ ក្នុងស្រទាប់យុវវ័យមួយចំនួនតូច កំពុងភ្លើតភ្លើនតាមវប្បធម៌បរទេស ធ្វើឲ្យព្រលឹងវប្បធម៌ជាតិខ្លួនត្រូវឃ្លាតឆ្ងាយ។ ដែលនេះជាភារកិច្ចដ៏ចាំបាច់បំផុតរបស់យើងទាំងអស់គ្នា គឺត្រូវទប់ស្កាត់នៃការហូរចូលវប្បធម៌អវិជ្ជមាន និងត្រូវរួមគ្នាលើកតម្កើង ការពារនោះគឺ អរិយ ធម៌ វប្បធម៌ ប្រពៃណីជាតិខ្មែរយើង សមស្របនឹងពាក្យស្លោក៖ «វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន។
ឯកឧត្តមបន្តថា ការអភិរក្ស ការថែរក្សា ការការពារ មិនត្រឹមតែជាកិច្ចការរបស់ មន្ទីរវប្បធម៌ និងវិចិត្រសិល្បៈប៉ុណ្ណោះទេ ប៉ុន្តែត្រូវទាមទារការចូលរួមពីគ្រប់ស្ថាប័ន មន្ទីរអង្គភាព អាជ្ញាធរមូលដ្ឋានគ្រប់លំដាប់ថ្នាក់ ជាពិសេសយើងទាំងអស់គ្នា ត្រូវខិតខំប្រឹងប្រែង ដើម្បីប្រែក្លាយកម្ពុជា ជាព្រះរាជាណាចក្រអច្ឆរិយៈដ៏រុងរឿង និងដើម្បីប្រែក្លាយទិវាវប្បធម៌ជាតិ ៣មីនា របស់យើងនេះ ឲ្យក្លាយជាទិវានៃការបង្កើនសក្តានុពលវប្បធម៌ជាតិ សំដៅធ្វើឲ្យវិស័យនេះបានចូលរួម ចំណែកយ៉ាងសកម្មដល់ការអភិវឌ្ឍសង្គម និងសេដ្ឋកិច្ចជាតិ៕ 
