(ខេត្តពោធិ៍សាត់)៖ សមត្ថកិច្ចនគរបាលនៃ អធិការដ្ឋាននគរបាល ស្រុកវាលវែង បានឲ្យដឹងនា ព្រឹកថ្ងៃពុធ ៥កើត ខែមាឃ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៤ ខែកុម្ភៈ ឆ្នាំ២០២៤ នេះថា កណ្តាលថ្ងៃត្រង់ម្សិលមិញ មានករណីគ្រោះ អគ្គីភ័យមួយបានកើតឡើង បណ្ដាលឲ្យខូចខាត ឃ្លាំងដាក់សម្ភារៈរបស់ ប្រជាកសិករ១ខ្នង រួមទាំងសម្ភារៈ ។
សមត្ថកិច្ច នគរបាលឲ្យដឹងទៀតថា ករណីអគ្គីភ័យឆាប ឆេះឃ្លាំងខាងលើ បានកើតឡើងនៅចំណុច អូរកំបោរ ស្ថិតនៅភូមិ ឃុំប្រម៉ោយ ស្រុកវាលវែង ខេត្តពោធិ៍សាត់ ។
សមត្ថកិច្ចបញ្ជាក់ទៀតថា ឃ្លាំងត្រូវបានអគ្គីភ័យឆាបឆេះទំហំ ទទឹងប្រវែង១៨ម៉ែត្រ គុណនឹងបណ្ដោយប្រវែង២០ម៉ែត្រ សង់អំពីឈើ ដំបូលប្រក់សង្ក័សី ជញ្ជាំងបាំងក្ដា ។ ម្ចាស់ផ្ទះឈ្មោះ ឡោ ឡាំ ភេទប្រុស អាយុ ៤៥ឆ្នាំ ជនជាតិខ្មែរ មុខរបរ កសិករ បច្ចុប្បន្ន មានទីលំនៅ ភូមិ.ឃុំកើតហេតុ ហើយឃ្លាំងនោះនៅក្រោយផ្ទះ ។ សម្ភារៈខូចខាត រួមមាន ឈើអារជា(ក្ដា)មួយចំនួន គ្រឿងសង្ហារឹម សម្ភារៈផ្សេងៗ និងត្រាក់ទ័រ១គ្រឿង ម៉ាក ហ្វត ។
នគរបាលបញ្ជាក់បន្ថែមទៀតថា ករណីអគ្គីភ័យឆាបឆេះឃ្លាំងខាងលើ ដែលបណ្ដាលឲ្យខូចខាតទាំងស្រុងនេះ ពុំមានបណ្តាលឲ្យមនុស្សរងរបួសនោះទេ មូលហេតុ ភ្លើងឆេះព្រៃរាលឆ្លងមកឆេះបែបនេះ ខណៈខែនេះជារដូវប្រាំងក្ដៅខ្លាំង រុក្ខជាតិផ្សេងៗខ្លោចក្រៀមងាយភ្លើងឆាបឆេះ ក្នុងឱកាសនោះដែរសមត្ថកិច្ច បានចេញរថយន្តពន្លត់អគ្គីភ័យ ដើម្បីជួយអន្តរាគមផងដែរ រួមបងប្អូនប្រជាពលរដ្ឋ នៅតំបន់កើតហេតុ ៕
