(ខេត្តបន្ទាយមានជ័យ)៖ ឯកឧត្តម អ៊ុំ រាត្រី អភិបាល នៃគណៈអភិបាល ខេត្តបន្ទាយមានជ័យ អញ្ជើញជាអធិបតី ភាពបិទសន្និបាតបូកសរុប វាយតម្លៃលទ្ធផល ការងារអប់រំយុវជន និងកីឡា ឆ្នាំសិក្សា ២០២៣-២០២៤ និងលើកទិសដៅឆ្នាំសិក្សា២០២៤-២០២៥ របស់មន្ទីរអប់រំ យុវជន និងកីឡាខេត្តបន្ទាយមានជ័យ នាថ្ងៃទី៣១ ខែមករា ឆ្នាំ២០២៥។
ក្នុងឱកាសនេះ ឯកឧត្ដម អ៊ុំ រាត្រី គាំទ្រចំពោះលទ្ធផល នៃអង្គសន្និបាតបូកសរុបវាយ តម្លៃការងារអប់រំយុវជន និង កីឡា ក្នុងរយៈពេលពេញមួយឆ្នាំនេះ តាមរយៈរបាយការណ៍ របស់លោកប្រធានមន្ទីរអប់រំ យុវជន និងកីឡាខេត្ត បានបង្ហាញពីលទ្ធផលនៃ ការពិភាក្សាផ្លាស់ប្តូរយោបល់ ក្នុងស្មារតីសហការ និងចែករំលែកបទពិសោធន៍ល្អៗ រៀនសូត្រពីគ្នាទៅវិញទៅ មកពិតជាទទួលបាន ចំណុចល្អៗជាច្រើន ដើម្បីបន្តយកទៅអនុវត្ត តាមមូលដ្ឋានរៀងៗខ្លួន ឱ្យមានប្រសិទ្ធភាព សម្រាប់ឆ្នាំសិក្សាថ្មីនេះ និងឆ្នាំបន្តបន្ទាប់ទៀត។
ដើម្បីឱ្យកម្មវិធីកំណែទម្រង់ ដំណើរការទៅប្រកបដោយប្រសិទ្ធភាព ឯកឧត្ដម បានផ្តល់អនុសាសន៍សំខាន់ៗ ៧ចំណុច ដោយផ្តោតសំខាន់ការ លើកកម្ពស់គុណភាព នៃការអប់រំនៅគ្រប់កម្រិត ពិសេសនៅកម្រិតបឋមសិក្សា និងមធ្យមសិក្សា ពង្រឹងគុណភាពនៃការ កសាងផែនការអប់រំ គ្រប់ប្រភេទនៅកម្រិតខេត្ត (មន្ទីរ) ក្រុង/ស្រុក និងសាលារៀន ដើម្បីជាត្រីវិស័យសម្រាប់ អភិវឌ្ឍន៍វិស័យអប់រំ យុវជន និងកីឡា នៅក្នុងខេត្ត, អភិវឌ្ឍសមត្ថភាពបន្ថែមដល់លោកគ្រូ អ្នកគ្រូ ដែលកំពុងបម្រើការនៅតាមសាលារៀន អំពីចំណេះដឹងវិជ្ជាជីវៈ ការអប់រំបំណិនជីវិត ការអប់រំព័ត៌មានវិទ្យា និងភាសាបរទេស ស្របតាមបរិបទ នៃការអប់រំតាមបែបឌីជីថល, ពង្រឹងការគ្រប់គ្រងសាលារៀនប្រកបដោយ ប្រសិទ្ធភាព តាមរយៈការជំរុញការអនុវត្តអភិក្រម នៃការគ្រប់គ្រងតាមសាលារៀន (SBM) និងពង្រឹងការប្រជុំបច្ចេកទេស ការធ្វើថ្នាក់និទស្សន៍ ការធ្វើអធិការកិច្ច ការពិនិត្យតាមដាន និងវាយតម្លៃ សាលារៀន និងថ្នាក់រៀន ។
ឯកឧត្ដម បន្តថា ដើម្បីលើកកម្ពស់ គុណភាពនៃការសិក្សា, បង្កើនគណនេយ្យភាព ហិរញ្ញវត្ថុសាធារណៈ និងការទទួលខុសត្រូវរបស់គ្រឹះស្ថាន សិក្សាក្នុងការប្រើប្រាស់ថវិកា និងការសម្រេចចិត្តលើកម្មវិធីនានា, បង្កឱកាសនិងលទ្ធភាពការចូលរួមរបស់ ដៃគូអភិវឌ្ឍន៍ សហគមន៍ និងផ្នែកឯកជន លើការអភិវឌ្ឍវិស័យអប់រំ យុវជន និងកីឡា ពិសេសនៅកម្រិតសាលា រៀន, និងអភិវឌ្ឍហេដ្ឋារចនា សម្ព័ន្ធរូបវ័ន្តឱ្យស្រប នឹងស្តង់ដារដូចជា សាងសង់អគារសិក្សា បណ្ណាល័យ ទីចាត់ការ បន្ទប់ពិសោធ បន្ទប់កុំព្យូទ័រ ទីលានអប់រំកាយ និងកីឡា បង្គន់អនាម័យ ទឹកស្អាត កន្លែងលាងដៃ ប្រអប់សង្គ្រោះ បឋម និងរោងជាងជាដើម៕
