(ភ្នំពេញ)៖ យោងតាមរបាយការណ៍ របស់សមត្ថកិច្ច នគរបាលខណ្ឌសែនសុខ នាព្រឹកថ្ងៃទី២៦ ខែកុម្ភៈ ឆ្នាំ២០២៤នេះបានឲ្យដឹងថា ក្រុមចោរដែលបានធ្វើ សកម្មភាពចូលផ្ទះវីឡាមួយកន្លែង នៅក្នុងសង្កាត់ក្រាំងធ្នង់ ខណ្ឌសែនសុខ រួចគាស់បំបែក ទូដែកយកលុយ និងគ្រឿងអលង្ការអស់ រាប់ម៉ឺនដុល្លារ កាលពីកន្លះខែមុខនោះ ត្រូវបានកម្លាំង នគរបាលខណ្ឌសែនសុខ សហការជាមួយ នគរបាលនាយកដ្ឋាន ព្រហ្មទណ្ឌក្រសួងមហាផ្ទៃ ស្រាវជ្រាវ ឃាត់ខ្លួនបានម្នាក់ទៀត កាលពី៦ល្ងាច ថ្ងៃទី២៤ ខែកុម្ភៈឆ្នាំ២០២៤ នៅចំណុចភូមិចំការចេក សង្កាត់អូរ៣ ក្រុងព្រះសីហនុ ខេត្តព្រះសីហនុ ។
សមត្ថកិច្ចបានឲ្យដឹងថា ជនសង្ស័យឈ្មោះ វង្ស សុជាតិ ភេទប្រុស អាយុ៤០ឆ្នាំ ស្នាក់នៅបន្ទប់ជួល ភូមិមច្ឆា សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
សមត្ថកិច្ចនគរបាល ខណ្ឌសែនសុខបានឲ្យដឹងថា ជនសង្ស័យរូបនេះជាជន ដៃដល់ក្នុងចំណោម បក្សពួក៣ ដែលបានធ្វើ សកម្មភាពលួចមាន ស្ថានទម្ងន់ទោស ដោយសារគាស់ ទម្លុះទម្លាយនៅត្រង់ ចំណុចផ្ទះវីឡា គ្មានលេខមួយកន្លែង នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ កាលពីថ្ងៃទី១០ ខែកុម្ភៈ ឆ្នាំ២០២៤ កន្លងមក ។
សមត្ថកិច្ចខណ្ឌ សែនសុខបានឲ្យដឹងថា នេះជាជនសង្ស័យទី៥ ហើយ ដែលត្រូវឃាត់ខ្លួន ដែលកាលពីថ្ងៃទី១៧ ខែកុម្ភៈ ឆ្នាំ២០២៤ សមត្ថកិច្ចនគរបាលខណ្ឌសែនសុខ ឃាត់ខ្លួនបានជនសង្ស័យ៤នាក់ (ប្រុស១ស្រី៣) ជាអ្នកសមគំនិត យកគ្រឿងអលង្ការ ដែលគាស់បានយកទៅលក់ឲ្យជនដៃដល់ ។
គួរបញ្ជាក់ផងដែរថា កាលពីម៉ោងប្រមាណ៧យប់ថ្ងៃ ទី១០ ខែកុម្ភៈ ឆ្នាំ២០២៤ មានករណីលួចមានស្ថាន ទម្ងន់ទោស ដោយគាស់ទម្លុះ ទំលាយយកទ្រព្យសម្បត្តិ នៅចំណុចផ្ទះវីឡា មួយកន្លែងស្ថិតនៅ តាមផ្លូវលំ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ដែលជនរងគ្រោះ ជាម្ចាស់ផ្ទះឈ្មោះ ឆាយ សុវណ្ណារី ភេទស្រី អាយុ៦៣ឆ្នាំ មុខរបរនៅផ្ទះ ។
ក្រុមចោរបានធ្វើសកម្មភាព ផ្លោះរបងចូលទៅក្នុងវីឡា ខាងលើកាត់ចំរឹងដែកចូល ក្នុងផ្ទះគាស់ទ្វារបន្ទប់ចូល គាស់បំបែក ទូដែកយកគ្រឿងអលង្ការ និងលុយ រួមមាន ៖ ខ្សែក ពេជ្រ២ខ្សែ, ខ្សែដៃពេជ្រ១ខ្សែ ,ចិញ្ចៀនពេជ្រ៤វង់, ខ្សែក មាសមួយតម្លឹង ១ខ្សែ , កងដៃមាសដាំត្បូងចំនួន២កង ,កងដៃមាសកូន ក្មេងចំនួន២កង, មាសដុំចំនួន៣តម្លឹង ,ត្បូងមិនទាន់ឆ្នៃចំនួន ប្រមាណ៤០-៥០គ្រាប់ ខ្សែដៃមាស១តម្លឹង និងលុយដុល្លារប្រមាណ១ម៉ឺនដុល្លារ ព្រមទាំងយកម៉ាស៊ីនផ្ទុកទិន្នន័យកាមេរ៉ាសុវត្ថិភាពចំនួន១គ្រឿងគេចបាត់ ។
តាមសមត្ថកិច្ចបាន ឲ្យដឹងទៀតថា បន្ទាប់ពីមានករណី គាស់ផ្ទះជនរងគ្រោះ បានមកដាក់ពាក្យបណ្តឹង ហើយនគរបាល ខណ្ឌសែនសុខ ក៏បានសហការ នគរបាលព្រហ្មទណ្ឌ ក្រសួងមហាផ្ទៃ ស្រាវជ្រាវឃាត់ខ្លួនបានជនសង្ស័យ ជាបន្តបន្ទាប់ចំនួន៥នាក់ ក្នុងនោះ អ្នកសមគំនិត៤នាក់ និងជនដៃដល់ម្នាក់។
តាមចម្លើយ សារភាពពីជនសង្ស័យ ឈ្មោះវង្ស សុជាតិ បានឲ្យដឹងថា នៅព្រឹកថ្ងៃកើតហេតុខ្លួនត្រូវបក្សពួកឈ្មោះ គង់ រ៉ាវុធ ហៅធី និងឈ្មោះតឿ (គេចខ្លួន)បានបើករថយន្តឡិចស៊ិស មួយគ្រឿងមកដឹកទៅធ្វើ សកម្មភាពគាស់ផ្ទះ ។ ដោយខ្លួនជាអ្នកចាំរថយន្ត ហើយឈ្មោះគង់ រ៉ាវុធ ហៅធី និងឈ្មោះ តឿ ជាអ្នកចូលធ្វើសកម្មភាពគាស់ផ្ទះ ។
បន្ទាប់ពីធ្វើសកម្មភាព បានសម្រេចហើយ ក៏បានគេចខ្លួនទៅ ផ្ទះជួលភូមិព្រៃទា សង្កាត់ចោមចៅ៣ រួចក៏បានឲ្យខ្លួន ជិះម៉ូតូកង់៣ទៅផ្ទះ ដោយប្រាប់ថា ប្រាក់ចំណែកចាំទាក់ទង គ្នានៅថ្ងៃស្អែក ។
លុះដល់ល្ងាចនៅថ្ងៃទី១១ ខែកុម្ភៈ ឆ្នាំ២០២៤ ជនសង្ស័យឈ្មោះ គង់ រ៉ាវុធ បានវេរលុយ ចំណែកតាមវីង ឲ្យ៤ពាន់ដុល្លារ ហើយខ្លួនក៏បាន ទៅដកយកទៅស៊ីចាយ និងគេចខ្លួនទៅ ខេត្តព្រះសីហនុ ក៏ត្រូវបានសមត្ថកិច្ច តាមចាប់ខ្លួនបានតែម្តង ៕
