ខេត្តរតនគិរី÷ នៅសាលមហោស្រព រតនៈ មន្ទីរវប្បធម៌និងវិចិត្រសិល្បៈខេត្ត កាលពីរសៀលថ្ងៃទី២៣ ខែកុម្ភៈ ឆ្នាំ២០២៥បានរៀបចំវេទិកាផ្សព្វផ្សាយនិងពិគ្រោះយោបល់ស្តីពីការចងក្រងសហគមកសិកម្មទំនើប សម្រាប់ដំណាំទុរេន ដំណាំម្រេច ដំណាំស្វាយចន្ទី និងដំណាំផ្សេងៗទៀត ក្រោមអធិបតីភាពលោក ញ៉ែម សំអឿន អភិបាលខេត្តរតនគិរី និងលោក អ៊ុក គង់ សមាជិកព្រឹទ្ធសភា និងជាអគ្គនាយកក្រុមហ៊ុន K&D។
ថ្លែងនៅក្នុងវេទិកានេះលោក ញ៉ែម សំអឿន អភិបាលខេត្តរតនគិរី បានលើកឡើងថា យោងតាមធាតុចូលជាច្រើនដែលទទួលបានពីបងប្អូនកសិករនៅក្នុងខេត្ត ក៏ដូចជា ដៃគូអភិវឌ្ឍ តាមរយៈមន្ត្រីកសិកម្ម និងវេទិកានានា រដ្ឋបាលខេត្តបានកត់សម្គាល់ឃើញថា មានការរអ៊ូរទាំចេញពីក្រុមផលិត ដែលបានលើកឡើងចំពោះទីផ្សារកសិផលមានលក្ខណៈតូចចង្អៀត និងមានតម្លៃទាប និងពេលខ្លះផលិតបានហើយ មិនដឹងថាយកទៅលក់នៅឯណា?
ក្តីកង្វល់ទាំងអស់នេះ ត្រូវបានរដ្ឋបាលខេត្តប្រមូលផ្តុំ និងរៀបចំជាផែនការយុទ្ធសាស្ត្រគ្រប់ជ្រុងជ្រោយ ដើម្បីព្យាយាមឲ្យអស់លទ្ធភាពក្នុងការស្វែងរកដំណោះស្រាយជូនបងប្អូនកសិករ ដោយធ្វើការផ្សព្វផ្សាយ កៀរគរ និងទាក់ទាញវិនិយោគិន ឲ្យចូលមកបណ្តាក់ទុននៅក្នុងខេត្តជាបន្តបន្ទាប់។
លោកបន្តថា តាមរយៈវេទិកាផ្សព្វផ្សាយ និងពិគ្រោះយោបល់ ស្តីពីការចងក្រងសហគមកសិកម្មទំនើប សម្រាប់ដំណាំទុរេន ដំណាំម្រេច ដំណាំស្វាយចន្ទី និងទីផ្សារបញ្ជាទិញ នៅថ្ងៃនេះ នឹងជួយដល់កសិករយើងទទួលបាននូវចំណេះដឹង និងបទពិសោធន៍ថ្មីៗបន្ថែមទៀត ក្នុងការដាំដំណាំយុទ្ធសាស្ត្រប្រកបដោយសក្តានុពល បែបទំនើប ជាពិសេស បញ្ហាខ្វះទីផ្សារ លែងជាកង្វល់តទៅទៀតហើយចាប់ពីនេះតទៅ។
ហើយវេទិកានេះ នឹងមានបទបង្ហាញចែករំលែកការដាំដំណាំ និងការបង្ហាញពីក្រុមហ៊ុនបញ្ជាទិញកសិផលរបស់បងប្អូន ក្នុងតម្លៃទីផ្សារសមរម្យអាចទទួលយកបាន តាមរយៈការចុះកិច្ចសន្យាដោយផ្ទាល់រវាងក្រុមហ៊ុន និងប្រជាកសិករ ក្រោមការសម្របសម្រួលរបស់អាជ្ញាធរខេត្ត ដែលមានមន្ទីរកសិកម្ម រុក្ខាប្រមាញ់ និងនេសាទ ជាសេនាធិការ ក្នុងនោះដែរទីផ្សានាំចេញដ៏ធំបំផុតរបស់ខេត្តរតនគិរី គឺក្រុមហ៊ុនពីប្រទេសចិន ជាអ្នកចុះមកទទួលទិញដោយផ្ទាល់។
ក្នុងនាមអាជ្ញាធរខេត្ត លោក ញ៉ែម សំអឿន បានគាំទ្រយ៉ាងពេញទំហឹងចំពោះក្រុមហ៊ុន K&D ក្រុមហ៊ុន H&G និងក្រុមហ៊ុនសេះបង្កង់ ដែលបានចូលរួមចំណែកក្នុងជួយដោះស្រាយចំពោះទុក្ខកង្វល់របស់ប្រជា កសិករនៅក្នុងខេត្តរតនគិរី ហើយក៏សូមស្នើដល់ក្រុមហ៊ុន ត្រូវយកចិត្តទុកដាក់ក្នុងការជួយដល់ប្រជាកសិករ រួមទាំងការកសាងទំនុកចិត្តគ្នាទៅវិញទៅមក ដើម្បីធានាថា ថ្លៃដើមផលិតទាប កសិផលមាន គុណភាព មានសុវត្ថិភាព និងមានតម្លៃល្អ ស្របតាមស្តង់ដារ GAP (Good Agriculture Practices) សម្រាប់ការនាំចេញ ក្នុងក្របខ័ណ្ឌប្រកួតប្រជែងទីផ្សារសេរី។
សូមបញ្ជាក់ផងដែរថា វេទិកានេះរៀបចំឡើង ក្នុងគោលបំណង ដើម្បីពង្រីកវិសាលភាព នៃកំណើនសេដ្ឋកិច្ចខេត្តរតនគិរី ក្នុងវិស័យកសិកម្ម និងកសិ-ឧស្សាហកម្ម ដោយធ្វើការផ្លាស់ប្តូរផ្នត់គំនិតកសិករ លើការងារដាំដុះដំណាំដែលមានសក្តានុពល ដោយប្រើប្រាស់ ផ្ទៃដីដាំដុះតិច ប៉ុន្តែអាចផ្តល់អត្ថប្រយោជន៍ច្រើនមានចំណូលខ្ពស់ និងការរំដោះខ្លួនឲ្យផុតពីបន្ទាត់នៃភាពក្រីក្រ ស្របតាមយុទ្ធសាស្ត្របញ្ច
កោណរបស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា ក្រោមការដឹកនាំដ៏ឆ្លាតវៃ ប្រកបដោយថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ឆ្ពោះទៅការសម្រេចគោលដៅយុទ្ធសាស្ត្រ ឆ្នាំ២០៣០-២០៥០៕BY:SAMNEANG
