ខេត្តកំពត: អភិបាលខេត្តកំពតបានលើកឡើងថា សុខសន្តិភាពជាមូលដ្ឋានគ្រិះ ដើម្បីធ្វើឲ្យប្រទេសជាតិមួយឈានទៅរកការអភិវឌ្ឍន៍ ប៉ុន្តែដើម្បីរក្សាសន្តិភាពបាន ទាមទាឲ្យប្រជាពលរដ្ឋគ្រប់រូប យល់ដឹងពីសារៈសំខាន់របស់សុខសន្តិភាពជាមុនសិន។ ហើយព្រះពុទ្ធសាសន៍បានដើរតួសំខាន់ ក្នុងការអប់រំទូន្មានប្រៀនប្រដៅមនុស្សឲ្យមានមេត្តា ករុណា មុទិតា និងឧបេក្ខា ស្គាល់បុណ្យនិងបាប ស្គាល់គុណ និងទោស។
ថ្លែងក្នុងពិធីសម្ពោធដាក់ឱ្យប្រើប្រាស់សាលាធម្មសភា និងសមិទ្ធផលនានាក្នុងវត្ត សិរីសោភ័ណ (ហៅវត្តព្រៃលើ) ស្ថិតក្នុងភូមិព្រៃលើ ឃុំបន្ទាយមាសខាងលិច ស្រុកបន្ទាយមាស កាលពីថ្ងៃទី១១ ខែកុម្ភ: ឆ្នាំ២០២៥ ឯកឧត្តម ម៉ៅ ធនិន អភិបាលខេត្តកំពត បានលើកឡើងថា សុខសន្តិភាពរកបានមកដោយកម្រ ហើយសន្តិភាពនៅកម្កុជា កើតចេញពីការលះបង់គ្រប់បែបយ៉ាងរបស់សម្តេចតេជោ ហ៊ុន សែន ប្រធានព្រឹទ្ធសភាជាតិ និងជាអតីតនាយករដ្ឋមន្ត្រី។ សុខសន្តិភាពមានតម្លៃជាងជីវិត និងធានាបាននូវភាពសុខសាន្តរបស់ពលរដ្ឋ ក៏ដូចជាការអភិវឌ្ឍន៍ប្រទេសឲ្យមានភាពរីកចម្រើន។
ឯកឧត្តមអភិបាលខេត្តបានបន្ត ដើម្បីថែរក្សាបាននុវសុខសន្តិភាពដ៏យូរអង្វែង ទាមទាឲ្យប្រជាពលរដ្ឋគ្រប់រូបមានការអប់រំ ស្គាល់បុណ្យ និងបាប ស្គាល់គុណ និងទោស មានចិត្តខ្លាចរអា និងអៀនខ្មាសចំពោះអំពើបាប ហើយនាំគ្នាបង្កើននូវគុណធម៌ក្នុងផ្លូវចិត្តនៅជីវិតរស់នៅប្រចាំថ្ងៃ ដោយគ្មានការបៀតបៀន និងឈ្នានីសអ្នកដដៃ។
ឯកឧត្តមបានបញ្ជាក់ថា ព្រះពុទ្ធសាសនាបានដើរតួសំខាន់ចំពោះរឿងមួយនេះ បច្ចុប្បន្នក្នុងផ្នត់គំនិតប្រមុខថ្នាក់ដឹកនាំ និងប្រជាពលរដ្ឋកម្ពុជាទាំងមូល គឺមានជំនឿលើរឿងបុណ្យនិងបាប ហើយរួបរួមគ្នាកសាងតែទង្វើល្អ ជាប្រយោជន៍ដល់ខ្លួន និងសង្គមជាតិ ដែលធ្វើឲ្យមតិអន្តរជាតិ មានការស្ញប់ស្ញែងចំពោះប្រទេសកម្ពុជា។
ដោយសារព្រះពុទ្ធសាសនាសំខាន់ដូច្នេះហើយ ទើបវត្តអារាម និងសមិទ្ធផលនានាដែលបំរើដល់វិស័យព្រះពុទ្ធសាសនា ត្រូវបានរាជរដ្ឋាភិបាល ក៏ដូចជាប្រជាពុទ្ធបរិស័ទ រួមគ្នាកសាងឡើងនៅគ្រប់ទីកន្លែង មិនថាទីក្រុង ទីប្រជុំជន ឬទីជនបទដាច់ស្រយាលនោះទេ។
ក្នុងឱកាសនោះដែរ ឯកឧត្តមអភិបាលខេត្តក៏បានប្រគេនបច្ច័យចំនួន ៤៣លានរៀល ជូនដល់វត្តសិរីសោភ័ណ (ហៅវត្តព្រៃលើ) ដើម្បីចាត់ចែងកសាងសាលាធម្មសភា និងបានផ្តល់អាចម៍ដីចាក់បំពេញទីតាំងសម្រាប់សាងសង់ មណ្ឌលសុខភាពភូមិព្រៃលើ ឃុំបន្ទាយមាសខាងលិច ស្រុកបន្ទាយមាសផងដែរ៕ដោយៈ សេង ណារិទ្ធ
