ខេត្តកំពត: ប្រធានក្រុមប្រឹក្សាសមាគមកាយឫទ្ធិនារីកម្ពុជាសាខាខេត្តកំពតបានធ្វើការជំរុញដល់សមាជិកាដែលស្ថិតក្នុងវ័យសិក្សាទាំងអស់ ត្រូវខិតខំប្រឹងប្រែងក្នុងការរៀនសូត្រឱ្យបានពូកែ និងត្រូវចេះរៀបចំផែនការឱ្យបានល្អិតល្អន់សម្រាប់បន្តការសិក្សានៅថ្នាក់មហាវិទ្យាល័យ ធ្វើយ៉ាងណាដើម្បីអភិវឌ្ឍខ្លួន ឱ្យក្លាយជាធនធានមនុស្សដែលមានសក្តានុពលក្នុងសង្គម។
មានមតិសំណេះសំណាលនៅក្នុងដំណើរ ចុះជួបសំណេះសំណាល និងនាំយកកាបូបដែលជាអំណោយដ៏ថ្លៃថ្លារបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការនៃសមាគមកាយឫទ្ធិនារីកម្ពុជា ជូនដល់សមាជិកា និងគ្រូបង្គោលចំនួន ៦សាលា ដែលស្ថិតក្នុងក្រុងកំពត ស្រុកទឹកឈូ និងក្រុងបូកគោថ្ងៃទី១២ ខែកុម្ភៈ ឆ្នាំ២០២៥ លោកជំទាវ ហ៊ុន ចាន់ធី ម៉ៅ ធនិន ប្រធានក្រុមប្រឹក្សាសមាគមកាយឫទ្ធិនារីកម្ពុជាសាខាខេត្តកំពត បានពាំនាំមកនូវការសាកសួរសុខទុក្ខ និងសេចក្តីនឹករលឹកពីសំណាក់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការនៃសមាគមកាយឫទ្ធិនារីកម្ពុជា ជូនដល់សមាជិកា និងគ្រូបង្គោលទាំងអស់ដែលបានចូលរួម។ ជាមួយគ្នានេះលោកជំទាវប្រធានក្រុមប្រឹក្សាសមាគម ក៏បានកោតសរសើរដល់សមាជិកា និងគ្រូបង្គោលទាំងអស់ដែលបានខិតខំលះបង់កម្លាំងកាយចិត្ត ពេលវេលា ដើម្បីចូលរួមក្នុងការងារសង្គម ក៏ដូចជាវគ្គបណ្តុះបណ្តាលផ្សេងៗទទួលបានលទ្ធផលល្អប្រសើរ។
ជាមួយគ្នានោះដែរ លោកជំទាវបានជំរុញ និងលើកទឹកចិត្តដល់សមាជិកាទាំងអស់ដែលកំពុងស្ថិតក្នុងវ័យសិក្សា ត្រូវខិតខំប្រឹងប្រែងក្នុងការរៀនសូត្រយកចំណេះដឹង ហើយត្រូវចេះរៀបចំផែនការបន្តការសិក្សានៅថ្នាក់មហាវិទ្យាល័យឲ្យបានច្បាស់លាស់ ធ្វើយ៉ាងណាដើម្បីអភិវឌ្ឍខ្លួន ឱ្យក្លាយជាធនធានមនុស្សដែលមានសក្តានុពលក្នុងសង្គម ស្របទៅតាមគោលដៅរបស់សមាគមកាយឫទ្ធិនារីកម្ពុជា ក្នុងលើការលើកកម្ពស់ដល់កុមារី យុវតី និងស្រី្ត ក្នុងការទទួលបានការអប់រំ អោយបានកាន់តែប្រសើរ។
លោកស្រី គង់ ទិត្យធីតា អនុប្រធានក្រុមប្រឹក្សាសមាគមកាយឫទ្ធិនារីកម្ពុជា សាខាខេត្តកំពត បានឱ្យដឹងថា កាបូបដែលជាអំណោយដ៏ថ្លៃថ្លារបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការនៃសមាគមកាយឫទ្ធិនារីកម្ពុជា ចែកជូនសមាជិកា និងគ្រូបង្គោលនាពេលនេះមានក្រុង-ស្រុកចំនួន៣ ក្នុងនោះ ក្រុងកំពត២សាលា (បឋមសិក្សាកំពតក្រុង២៤នាក់, អនុវិទ្យាល័យកំពតក្រុង ៦១នាក់) ស្រុកទឹកឈូមានពីរសាលា (បឋមសិក្សាក្បាលរមាស ១៧នាក់, អនុវិទ្យាល័យរណឫទ្ធិ សរុប ៤៩នាក់), ក្រុងបូកគោមាន២សាលា (បឋមសិក្សារស្មីខេមរៈ ៣២នាក់, អនុវិទ្យាល័យសម្តេច ហ៊ុន សែនរលួស ៣២នាក់)៕ ដោយៈ សេង ណារិទ្ធ
