(ខេត្តបន្ទាយមានជ័យ)៖ កម្លាំងកងរាជអាវុធហត្ថ ឃាត់ខ្លួនជនសង្ស័យ៣នាក់ លួចម៉ូតូ យកទៅបញ្ចាំទិញគ្រឿងញៀន ប្រើប្រាស់បញ្ជូនទៅ សាលាដំបូងខេត្ត បន្ទាយមានជ័យ នៅថ្ងៃទី២៣ ខែកក្តដា ឆ្នាំ២០២៤។
លោកវរសេនីយ៍ត្រី នួន នីណារ៉ូ បញ្ជាការកងរាជ អាវុធហត្ថក្រុងប៉ោយប៉ែត បានឲ្យដឹងថា៖ ជនសង្ស័យទាំង៣នាក់ ដែលឃាត់ខ្លួនបាន ១-ឈ្មោះ ខាំ សុង ភេទប្រុស អាយុ៤៤ឆ្នាំ, ២-ឈ្មោះ ឆន ឆៃលី ភេទប្រុស អាយុ៣៩ឆ្នាំ (ជនសង្ស័យទាំង២នាក់ ស្នាក់នៅមិនពិតប្រាកដ ក្នុងក្រុងប៉ោយប៉ែត) ,៣-ឈ្មោះទូច ពៅភេទប្រុស អាយុ៣១ឆ្នាំ បច្ចុប្បន្នស្នាក់នៅ ភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ជាមួយគ្នានោះកម្លាំងក៏បានដកហូតវត្ថុតាង ម៉ូតូម៉ាកហុដា PCX ពណ៌ប្រាក់-ខ្មៅ ផលិតឆ្នាំ២០១៨ ចំនួន០១គ្រឿង។
លោកវរសេនីយ៍ត្រី នួន នីណារ៉ូ បានបញ្ជាក់ថា៖ ក្រោយពីទទួលបានពាក្យ បណ្តឹងពីជនរងគ្រោះឈ្មោះ ស្រី ថានី ភេទស្រី អាយុ៣៧ឆ្នាំ រស់នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានបាត់ម៉ូតូ កាលពីវេលាម៉ោង០៦និង០០នាទី ថ្ងៃទី២០ ខែកក្កដា ឆ្នាំ២០២៤ នៅចំណុចភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ ក្រោយពីទទួលបានពាក្យបណ្ដឹងរបស់ជនរងគ្រោះ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រីនួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះទៅដល់កន្លែងកើតហេតុ ធ្វើការស្រាវជ្រាវនិងកំណត់ មុខរហូតឃាត់បាន ជនសង្ស័យខាងលើ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋាន កងរាជអាវុធហត្ថក្រុងបានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ពួកខ្លួនពិតបានលួចម៉ូតូ របស់ជនរងគ្រោះ ពិតប្រាកដមែន និងយកទៅបញ្ចាំបានលុយ យកមកស៊ីចាយ ព្រមទាំងទិញគ្រឿងញៀន យកមកប្រើប្រាស់ផង កសាងសំណុំរឿងបញ្ជូន ទៅកាន់ជំនាញកង រាជអាវុធហត្ថខេត្ត ហើយបញ្ជូនបន្តទៅ សាលាដំបូងខេត្តបន្ទាយមានជ័យ ចាត់ការតាមនីតិវិធី។ ចំណែកម៉ូតូជនរងគ្រោះ ត្រូវបានប្រគល់ ជូនជនរងគ្រោះវិញ៕
