(ខេត្តកែប)៖ ជាប្រវត្តិសាស្ត្ររបស់ ខេត្តកែបហើយ ដែលមានកំពង់ផែដឹក ជញ្ជូនទំនិញកម្រិតធ្ងន់ ដោយមានសមត្ថភាព ក្នុងការដឹកជញ្ជូនទំនិញ បានពី៥ពាន់តោន ដល់៨ពាន់តោន ហើយចាប់ពីដំណើរ ការសាងសង់ រហូតមក ទល់ពេលនេះ ចំណតជលយានសេះស ឬ(កំពង់ផែសេះស) សម្រេចការសាងសង់របស់ខ្លួន ប្រមាណ៩០%ហើយ ដោយគ្រោងនឹង បញ្ចប់ក្នុងពេលឆាប់ៗនេះ។
នេះបើតាមការលើកឡើងរបស់ លោក កូវ គឹមហាក់ តំណាងក្រុមហ៊ុន ដែលកំពុងសាងសង់ កំពង់ផែសេះស។លោកបន្តថា យើងបានអនុវត្តន៍ គម្រោងសាងសង់នេះ អស់រយ:ពេល២ឆ្នាំមកហើយ ក្នុងនោះយើង សម្រេចបានលទ្ធផល ក្នុងរង្វង់ប្រមាណ៩០% ហើយដែរ។។
ជាមួយនឹងការសាងសង់ យើងសម្រេចបានការចាក់ដី និងឈូសឆាយ បំពេញទីលានកំពង់ផែ សាងសង់ផែបេតុង ដោយបានចាក់គ្រឹះ រៀបជញ្ជាំងទប់ដី និងធ្នឹម ការចាក់បេតុងលើទីលានផែ និងជួសជុលផ្លូវ សម្រាប់ចូលកំពង់ផែ ដែលមានប្រវែង២០០ម៉ែត្រ រួមជាមួយនឹងគ្រឿង សង្ហារឹមមួយចំនួនផងដែរ។
លោកបានបញ្ជាក់ទៀតថា ក្រោយពីសាងសង់រួច កំពង់ផែមួយនេះមានសមត្ថភាពអាចផ្ទុកទំនិញបានពី5ពាន់តោន ទៅ 8ពាន់តោន។ ដោយសារទឺតាំងដែល យើងកំពុងសាងសង់ជា ប្រភេទដីល្បាប់(ដីខ្មៅ) ពិតណាស់វាមិនអាច ដំណើរការបានទេ ប្រសិនបើយើងមិន បានកាយដីស្អុយ ទាំងនោះចេញ ហើយជំនួសមក វិញដោយដីដែលមានគុណភាព អាចទ្រទ្រង់ទម្ងន់ ដ៏ធ្ងន់នេះបាន។បន្ថែមពីនេះ ហេដ្ឋារចនាសម្ព័ន្ធនេះ ធ្វើឡើងស្របទៅ តាមគុណភាពខ្ពស់ ណាស់ទើបមាន សមត្ថភាពអាចទ្រ ទម្ងន់ដ៏ធ្ងន់នេះបាន។
គួរបញ្ជាក់ថា គម្រោងសាងសង់ចំណត ជលយានសេះសនេះ ជាប្រភេទគម្រោងវិនិយោគ BOT ដែលទទួល បានការគាំទ្រពីរដ្ឋបាលខេត្ត ជាគម្រោងវិនិយោគ ចំណតជលយាន (កំពង់ផែសេះស) ស្ថិតនៅភូមិអូរក្រសារ សង្កាត់អូរក្រសារ ក្រុងកែប ខេត្តកែប និងស្របតាមស្មារតី លិខិតរបស់ក្រសួងសេដ្ឋកិច្ច និងហិរញ្ញវត្ថុ នៅលើផ្ទៃដីទំហំ ៣០,០០០ម៉ែត្រការ៉េ។
គេរំពឹងថាកំពង់ផែដឹក ទំនិញធន់ធ្ងន់មួយនេះ ពិតណាស់នឹងអាចរកចំណូល ជូនជាតិ ដែលឈានទៅពង្រីក សេដ្ឋកិច្ចខេត្តកែប ពិសេសជាឱកាសការងារ ដល់ប្រជាពលរដ្ឋ និងសហគមន៍ក្នុ ងខេត្តកែបទាំងមូល៕ រាយការដោយលោក សេង ណារិទ្ធ
