(ខេត្តកែប)៖ កាលពីព្រឹកថ្ងៃអង្គារ ទី១៤ ខែឧសភា ឆ្នាំ២០២៤នេះ ឯកឧត្ដម បណ្ឌិត សោម ពិសិដ្ឋ អភិបាល នៃគណ:អភិបាលខេត្តកែប បានដឹកនាំមន្ត្រីរាជការ កងកម្លាំងប្រដាប់អាវុធ ដើម្បីរៀបចំពិធីបុណ្យ ចម្រើនព្រះជន្ម ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា គម្រប់ព្រះជន្មាយុ ៧១យាងចូល៧២ព្រះវស្សា។
ក្នុងពិធីនេះ ឯកឧត្ដម បណ្ឌិត សោម ពិសិដ្ឋ បានថ្លែងសារលិខិត ថ្វាយព្រះពរដោយ មានខ្លឹមសារថា ទួលព្រះបង្គំតាងនាម ក្រុមប្រឹក្សាខេត្ត គណ:អភិបាលខេត្ត មន្ត្រីរាជការគ្រប់លំដាប់ថ្នាក់ កងម្លាំងប្រដាប់អាវុធគ្រប់ប្រភេទ ព្រះសង្ឍ និងប្រជាពលរដ្ឋ ទូទាំងខេត្តកែប សូមព្រះបរមរាជា នុញ្ញាតក្រាបបង្គំអភិវន្ទ សំដែងថ្វាយនូវអំណរសាទរ ប្រកបដោយ មនោសញ្ចេតនា រំភើបរីករាយយ៉ាង ក្រៃលែងថ្វាយ ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការ:ដ៏ខ្ពង់ខ្ពស់បំផុត។
ក្នុងឱកាសដ៏អភិសិរីមង្គល នៃព្រះរាជពិធីបុណ្យ ចម្រើនព្រះជន្មាយុ គម្រប់៧១យាងចូល៧២ព្រះវស្សា ដែលនឹងប្រព្រឹត្តទៅនៅថ្ងៃនេះ ទូលព្រះបង្គំ យើងខ្ញុំទាំងអស់គ្នា សូមព្រះបរមរាជា នុញ្ញាតអភិវន្ទ លំឱនកាយ វាចាចិត្ត ក្រាបបង្គំសំដែង ថ្វាយនូវគារវកិច្ច ប្រកបដោយកតញ្ញូកត វេទិតាយ៉ាងជ្រាលជ្រៅបំផុត ចំពោះព្រះរាជគុណូបការ: និងព្រះមហាករុណាទិគុណដ៏ពិសិដ្ឋ ថ្លៃថ្លារបស់ព្រះករុណា ជាអម្ចាស់ជីវិតលើត្បូង ដែលជានិច្ចកាល ព្រះអង្គតែងយកអស់ កម្លាំងព្រះកាយពល និងព្រះបញ្ញាញាណ បំពេញព្រះរាជកិច្ចបម្រើឧត្តមប្រយោជន៍ ជាតិមាតុភូមិ និងប្រជារាស្ត្រ ប្រកបដោយស្វាមីភក្តី ដ៏ឧត្តុង្គឧត្តមបំផុត ព្រមទាំងបានរួមវំណែក យ៉ាងធំធេងជា មួយរាជរដ្ឋាភិបាល ក្នុងការដោះស្រាយ ទុក្ខលំបាករបស់ប្រជារាស្ត្រ កាត់បន្ថយភាពក្រីក្រ និងអភិវឌ្ឍន៍មាតុភូមិកម្ពុជា ជាទីស្នេហា អោយមានភាពរីកចម្រើន ជឿនលឿនថ្កុំថ្កើង រុងរឿងយ៉ាងឆាប់រហ័ស។
ស្ថិតក្នុងឱកាសដ៏ មហាជ័យមង្គលាភិរម្យថ្លៃថ្លានេះ ទួលព្រះបង្គំ យើងខ្ញុំទាំងអស់គ្នា សូមលើកហត្ថប្រណម្យ បួងសួងដល់គុណ បុណ្យព្រះរតនត្រ័យ កែវទាំងបី វត្ថុស័ក្តិសិទ្ធ ទាំងឡាយក្នុងលោក ទេវតាថែរក្សាទឹកដី នៃព្រះរាជាណាចក្រកម្ពុជា ទេវតាឆ្នាំថ្មី ព្រះនាម មហោទរាទេវី ឫទ្ធីបារមី ទេវតាថែរក្សា ព្រះមហាស្វេតច្ឆត្រ បុណ្យបារមីនៃ ដួងព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ សូមជួយអភិបាលប្រោះព្រំ ព្រះរាជសព្ទសាធុការពរ សិរីសួស្តី ជ័យមង្គល វិបុលសុខ បវរមហាប្រសើរថ្វាយ ព្រះករុណាជា អម្ចាស់ជីវិតលើត្បូង សូមព្រះអង្គបានសមប្រកប ដោយព្រះពុទ្ធពរ ទាំងបួនប្រកាគឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ ដើម្បីគង់ប្រថាប់ជា ម្លប់ដ៏ត្រជាក់ត្រជុំ សុខដុមរមនា សម្រាប់កូនចៅ និងប្រជារាស្ត្រ របស់ព្រះអង្គ ជានិច្ចនិរន្តន៍តរៀងទៅ៕ ដោយលោក សេង ណារិទ្ធ
