(ភ្នំពេញ)៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រីកម្ពុជា បានពន្យល់ប្រាប់សមភាគី វៀតណាមរបស់លោកថា គម្រោង «ព្រែកជីកហ្វូណន តេជោ» នឹងជួយកាត់បន្ថយ ទឹកជំនន់នៅខេត្តចំនួន ៥ នៅក្នុងប្រទេសកម្ពុជា និងអាចការពារមិនឱ្យ មានទឹកជំនន់ពីប្រទេស កម្ពុជាហូរចូល ប្រទេសវៀតណាម។
លោក បញ្ជាក់ថា ផ្លូវទឹកព្រែកជីកនេះនឹង មានការសាងសង់ សន្ទះផ្លូវទឹកចំនួន ៣កន្លែង ស្ថិតនៅខេត្តកណ្ដាល តាកែវ និងកែប ដែលធានាបាននូវ ប្រសិទ្ធភាពក្នុងការទប់ស្កាត់ ការជ្រៀតចូលនៃទឹកប្រៃ ទៅក្នុងបណ្ដាញផ្លូវទឹកសាប និងអាចកំណត់បរិមាណនិ ងអត្រានៃរំហូរទឹកសាប ដែលត្រូវហូរចេញ ទៅសមុទ្របាន ដែលមិន អាចបង្កឱ្យមានផល ប៉ះពាល់លើផ្នែក បរិស្ថានក្នុងប្រទេស ឬបង្កផលប៉ះពាល់ជា អវិជ្ជមានឆ្លងដែន ទៅប្រទេសជិតខាងបានឡើយ។
លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) លើកឡើងដូច្នេះក្នុងជំនួប ជាមួយលោក Lee Minh Khai ឧបនាយករដ្ឋមន្ត្រីវៀតណាម នាថ្ងៃទី២៣ ខែឧសភា នៅទីក្រុងតូក្យូ ប្រទេសជប៉ុន ក្នុងឱកាសសន្និសីទ អន្តរជាតិលើកទី២៩ ស្ដីពីអនាគតរបស់អាស៊ី។
លោកពន្យល់ថា៖ «ប៉ុន្តែផ្ទុយទៅវិញ គម្រោងនេះនឹងជួយ រក្សាលំនឹងចីរភាពបរិស្ថាន ប្រព័ន្ធអេកូឡូស៊ី និងបង្កើត ជម្រកចម្រុះគ្រប់ប្រភេទ ដែលមានសារប្រយោជន៍ សម្រាប់ការកកើតនៃ ពពួកវារីសត្វ រុក្ខជាតិ និងមច្ឆាជាតិគ្រប់ប្រភេទ កាត់បន្ថយទឹកជំនន់ នៅខេត្តចំនួន៥ នៅក្នុងប្រទេសកម្ពុជា និងអាចការពារមិន ឱ្យមានទឹកជំនន់ ពីប្រទេសកម្ពុជាហូរ ចូលប្រទេសវៀតណាម»។ នេះបើយោងតាមសេចក្តី ប្រកាសព័ត៌មាន CDC នាថ្ងៃទី២៤ ឧសភា។
លោក ស៊ុន ចាន់ថុល បានដកស្រង់ការសិក្សា «យ៉ាងលម្អិត» ដែលបង្ហាញថា បច្ចុប្បន្នទឹកហូរពីទន្លេមេគង្គ ទៅសមុទ្រមានប្រមាណ ៨០០០ម៉ែត្រគូបក្នុងមួយវិនាទី ហើយថាចំពោះ ទន្លេបាសាក់មានទំហំ ១៤០០ម៉ែត្រគូបក្នុងមួយវិនាទី ចំណែកគម្រោង ព្រែកជីកហ្វូណននឹង ប្រើប្រាស់ទឹកត្រឹមតែ ៥ម៉ែត្រគូបក្នុងមួយវិនាទី តែប៉ុណ្ណោះ ឬប្រមាណ ០,០៥៣ភាគរយ។
លោកពន្យល់ថា គម្រោងនេះជាព្រែកជីក ដែលជីកលើតម្រាយ ខ្សែផ្លូវទឹកធម្មជាតិ និងផ្លូវទឹកបុរាណដែល បានបន្សល់ទុកស្រាប់ ហើយធ្លាប់បានប្រើប្រាស់តាំងពីអាណាចក្រហ្វូណន ហើយថា កម្ពុជាបានធ្វើការសិក្សាយ៉ាងលម្អិតអស់ រយៈពេលប្រមាណជាង២ឆ្នាំ ដោយមានការចូលរួម ពីជំនាញការបច្ចេកទេស ជាន់ខ្ពស់សរុបចំនួន៤៨នាក់។
លោកឧបនាយករដ្ឋមន្ត្រីបន្ថែមថា ក្នុងចំណោម៤៨នាក់នោះ មានកម្រិតជំនាញ ជាសាស្រ្តាចារ្យមហាបរិញ្ញា វិទ្យាសាស្ត្រចំនួន១១នាក់ វិស្វករជាន់ខ្ពស់លំដាប់ ពិភពលោកចំនួន៣០នាក់ និងកម្រិតវិស្វករចំនួន ៧នាក់ ដែលសុទ្ធសឹង តែមានជំនាញនិង បទពិសោធន៍ជាច្រើនឆ្នាំ លើវិស្វកម្មសំណង់ផ្លូវទឹក វិស្វកម្មបូមស្តារព្រែកជីក ការរចនាប្លង់សាងសង់ផ្លូវទឹក វិភាគជលសាស្ត្រ បរិស្ថាន សេដ្ឋកិច្ចសង្គម និងគ្រប់ទិដ្ឋភាពជំនាញបច្ចេកទេស លើគ្រប់វិស័យដែលពាក់ព័ន្ធ។
ពាក់ព័ន្ធនឹងការចោទប្រកាន់ថា ព្រែកជីកនេះនឹងត្រូវបាន ប្រើប្រាស់ដោយកងទ័ពចិន សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី បានថ្លែងកាលពីខែមេសា ថា កម្ពុជាមិនល្ងង់រហូតដល់ យកកងទ័ពចិន មកដាក់លើទឹកដី របស់ខ្លួនដែលផ្ទុយទៅ នឹងរដ្ឋធម្មនុញ្ញរបស់ខ្លួននោះទេ។
លោកបន្ថែមថា ចិនក៏មិនល្ងង់យកកងទ័ព មកដាក់ចោលក្នុងស្រុកខ្មែរ ដែលផ្ទុយនឹងគោលការណ៍ នៃការគោរពឯករាជ្យភាព និងអធិបតេយ្យភាព របស់កម្ពុជានោះដែរ។
គម្រោងព្រែកជីក ដែលមានប្រវែង១៨០គីឡូម៉ែត្រ នេះនឹងចំណាយទឹកប្រាក់ ១,៧ពាន់លានដុល្លារ និងពេលវេលាសាងសង់ ៤ឆ្នាំ។
ក្នុងសុន្ទរកថាពិសេស នៅវេលាថ្ងៃត្រង់ថ្ងៃទី១៦ ខែឧសភា សម្តេចតេជោ ហ៊ុន សែន បានផ្ដល់មតិឱ្យ រាជរដ្ឋាភិបាលចាប់ផ្ដើម សាងសង់ព្រែកជីកនេះ ឱ្យបានឆាប់តាមតែអាចធ្វើបាន៕
